الأخبار

المحامية ساندرا جريجيري خرجت عن صمتها...

كل يومين بيطلعلنا حدا يحكي عن زحلة وشباب زحلة وزعيم زحلة ويوصفن بأوصاف ما بتليق فيهن مفكرين حالن شي ، جربت اسكت ما بقى فيي ، لكل هودي الأشخاص الجاهلين بحب قلن لحتى  تفهمو ليه كانت ردة فعل زحلة بهالشكل لازم تعرفو مين بكون إيلي بيك السكاف ، هو شخص مش مارق عراسكن متلو ولا رح يمرق ، سياسي مثالي كفو نظيف ما تلوت بالدم ولا بالتسليح ولا بسرقة المال العام ، شخص باع أملاكو ورزقو حتى يصرف على خدمة الناس ، هو انسان مثالي ما في كلام بيقدر يوصفو بس باختصار ادمي متواضع قلبو طيب عندو اخلاق مهذب ما في مرة اذى حدا ، لما سمعت الحكي البشع لي نقال بحقو من أشخاص ما بيستحقو نقول عنن أشخاص غضبت كتير ما كنت روق إلا لما فكرت فيه ، تخيلت أنو البيك عم يطلع فيي ويبتسم ويقلي سامحوهن ما بيعرفو شو عم يقولو .. ساعتها رقت وقلت لو ما هني جاهلين وما بيعرفو البيك ما كانو قالو لي قالوه ، وكرمال هيك قررت عرفن عنو . هيدا هوي البيك لي عاش حياة مسيحية حقيقية على مثال المسيح ، ما في نهار فرق بين غني او فقير بين كبير او صغير بين مسلم او مسيحي ، ما في مرة حدا دق بابو إلا ما قتل حالو ليخدمو ويساعدو ، وقف حدنا حزن مع أحزاننا فرح لفرحنا شق على مرضانا زارنا اهتم بكل واحد فينا وقف شبين لكتار ساعد الفقرا سّفر مرضى ليلقوا العلاج برا عحسابو ... عمل كتير أعمال رحمة ومحبة ما فينا نعدا كلا بس الأهم أنو حب زحلة وأهل زحلة ومصلحة زحلة أكتر من حالو أكتر من مصلحتو . هيدا الزعيم لي مافي متلو ولا رح يمرق حدا متلو ، هيدا الزعيم لي شو ما عملتلو زحلة لتكرمو قليل عليه ، 

أما عن القواص بحب وضح للغربا عن زحلة أنو زحلة بالرغم من أنها مدينة مهمة وهي أول جمهورية بالشرق ضلت محافظة عتقاليدا وعاداتا ، ولما يتجوز زحلاوي منحملو عكتافنا ومنمشي عالرصاص ولما يموت شخص زحلاوي منحملو عالراحات ومنمشي عالرصاص ، هيدا لنعبرلو عن محبتنا وفرحتنا بفرحو وحزننا بموتو ولنكرمو ، كرمال هيك زعيم بحجم السكاف أقل شي أنو نقوصلو بركي صوت الرصاص بعبر عن غضبنا وحزننا ، بس حتى صوت الرصاص ما كان كافي ولو كان فينا نفجر أقوى من الرصاص كمان كان بيلبقلو ....

ولكل لي وصفونا بالتخلف والمتخلفين بحب قلن إذا الوفا تخلف يعيش التخلف 

إذا النخوة تخلف يعيش التخلف 

إذا احترام الموت تخلف يعيش التخلف 

وعم توصفو شباب زحلة أنن متخلفين ؟؟ إذا الرجولة والنخوة والوفا تخلف ؟؟ يعيش التخلف ونعم متخلفين لأنن بعدن متل رجال زمان لي ما بقى في متلن كتير بغير مناطق الرجال لي عندن نخوة ووفا لي بيقفو مع ابن منطقتن ولي ما ممكن يشوفو شخص عم ينطعن عالطريق ويوقفو يتفرجو متل غيرن كانو اكلو بسنانن ، هودي أبطال زحلة لي منفتخر فيهن ومنرفع راسنا فيهن . وضيعان قلبك يا بيك وضيعان الاوادم تيتمت زحلة بموتك .